މައިންގެ ދުވަހުގެ ތަހުނިޔާ
އަރިސްކުރާހިނދު ދަންނަވާހިތްވަނީ:
މައިންނޭވެ! މައިންގެ މަޤާމުތަކުގައި
ބާރުވެރިވާށެވެ!
އާދަމް ޒާހިރު (ކުރޮޅި)
މީލާދީ ކޮންމެ އަހަރެއްގެ މޭމަހުގެ 10 ވަނަ ދުވަހަކީ ރާއްޖޭގައި ފާހަގަކުރާ
މައިންގެ ދުވަހެވެ. ދުނިޔޭގެ ގިނަ ޤައުމުތަކެއްގައި މި ދުވަސް ފާހަގަކުރެއެވެ.
ނަމަވެސް ތަފާތު ދުވަސްތަކެއްގައެވެ. މޭ 4، މޭ 11، އަދި މާރޗް 25 ގެ އިތުރަށް
މިނޫން އެތައް ދުވަހެއް އެކި ޤައުމުގައި މި ދުވަސް ފާހަގަކުރުމަށް
ކަނޑައަޅައިފައިވެއެވެ. ރާއްޖޭގައި މި ދުވަސް ފާހަގަކުރަނީ، އަދި މިއަހަރު
ކުރީވެސް މޭ 10 ގައެވެ.
މައިވަންތަކަމާއި މައި ލޯބީގެ ބާރާއި މައިވަންތަ ގުޅުމުގެ އަގު
ޙިމާޔަތްކުރުމާއެކު މައިންގެ ޙައްޤުތަކަށް އަޑު އުފުލުގެ ޚާއްސަ ދުވަހެއްގެ
ގޮތުގައި މިދުވަސް ފާހަގަކުރާތާ އަހަރުތަކެއް ވެއްޖެއެވެ. ޖަމާޢަތުގައި މައިންގެ
އަގު އުފުލުމަށާއި އިސްލާޙުކުރަންޖެހިފައިވާ މައިންގެ ޢަމަލުތަކާމެދު
ސަމާލުކުރުވުމަށާއި ގެއްލެމުންދާ މައިންގެ ހައިސިއްޔަތު އަނބުރާ ލިބިގަތުމަށް
ބެލްޖިއަމްގައި އަޑު އުފުލާފަދައިން މުޅި އިންސާނިއްޔަތު ސަމާލުކުރުވުމަށް
މިދުވަސް ޚާއްސަކުޅައީއެވެ. އެހެންކަމުން މި ދުވަހުގެ މުނާސަބާގައި ކޮންމެ މަޔަކަށްމެ
ހެޔޮދުޢާކުރަމެވެ.
މައިންގެ ޙައްޤުގައި އަޑު އުފުލުމަށް އެންމެ ފުރަތަމަ ދުވަސް ފާހަގަކުރަން
ފެށިކަން ތާރީޚުން އެނގެނީ ގްރީސްއެވެ. މިއަށްފަހު އެމެރިކާގައި ހިލަރިއާ
ފެސްޓިވަލްގެ ނަމުގައި ފާހަގަކުރި މުނާސަބަތެއް ފުޅާވެ ގޮސް މިއަޑު ދުނިޔޭގައި
އުފުލުނީއެވެ. މި ދުވަސް ފާހަހަކުރުމުގައި ހުޅަނގުގައި "މަދަރިން
ސަންޑޭ" ގެ ނަމުގައިވެސް ދުވަސް ފާހަގަކުރިކަން އެނގެއެވެ. އެންމެފަހުން
ޔޫއެންގެ ސަމާލުކަމަށް މި ކަން އައިސްފައިވަނީ 20 ވަނަ ޤަރުނުގެ ކުރީކޮޅުގައެވެ.
މިހިސާބުން ބައިނަލްއަޤްވާމީ ދުވަހެއްގެގޮތުގައި މައިންގެ ދުވަހެއް
ފާހަގަކުރަންނިންމައިފައިވަނީއެވެ.
އެމެރިކާގައި މީލާދީން 1908 ގައި މައިންގެ ދުވަސް ފާހަގަކުރަންފެށިކަން
ތާރީޚުގައި ލިޔެފައިވެއެވެ. ދުނިޔޭގެ ގިނަ ގައުމުތައް ފަދައިން ޚިދުމަތްތެރި
މަޝްހޫރު ބޭފުޅުންގެ މައިންގެ ހަނދާނުގައި މި ދުވަސް ވާހަގަކުރުމަށް އެމެރިކާ ގައި
ޙަރަކާތްތައް ހިންގައެވެ. މިގޮތުން އަންނާ ޖާވިސްގެ މަންމަ ގްރެފްޓޮން ގެ
ހަނދާނުގައި ދުވަސް ފާހަގަކުރަން ފެށިކަން އެނގެއެވެ. ހުޅަނގުގެ ގިނަ ޤައުމުތަކުގައި
މި ދުވަސްފާހަގަކުރާނޭ ދުވަހެއް ކަނޑައެޅި ނިންމައިފައިވަނީ މިފަދަ ކޮންމެވެސް
މުހިންމު ޝަޚްސެއްގެ ހަނދާނުގައެވެ. ވީމާ މި ފަދަ ދުވަސްތަކުގެ ހަނދާނާއެކު
ޝަޚްސުންގެ ހަނދާންތައްެވެސް އާވެގެން އާދެއެވެ.
ދުވަހެއް ފާހަގަކުރަނީ ސަމާސާއަކަށް ނޫނެވެ. އަދި ނަމެއްގައި
ކަންކޮށްލާކަށްވެސް ނޫނެވެ. މައިންގެ ދުވަސް ފާހަގަކުރަނީވެސް މިގޮތުން ޚާއްސަ
ބޭނުމަކަށްޓަކައެވެ. މަޤުޞަދެއްގެ ބޭނުމުގައެވެ.
"ދުޅަހެޔޮ މަޔަކު ނެތި ދުޅަހެޔޮ ޖަމާޢަތެއް ނޯންނާނެ" އެވެ.
އެހެންކަމުން މައިންގެ ދުވަހެއް ފާހަގަކުރުމުގެ އެއް މަޤުޞަދެއްކަމުގައި މައިން
ދުޅަހެޔޮ ބަޔަކަށް ހަދައި އެބައިމީހުން އުފާކުރުން ހިމެނެއެވެ. ގިނަ
ޤައުމުތަކުގައި މައިން ވެފައިވަނި ބުރަކޮށް މަސައްކަތްކުރާ އަދި ޒިންމާދާރު
ވާޖިބުތަކަކާ ޙަވާލުވެފައިވާ ދަރިންގެ އެންމެ ގާތް މީހާކަމުގައެވެ. އެހެންކަމުން
އެ ބުރައިން ދުރައްޖެހިލުމަށް ފުރުސަތު ލިބުމަށާއި އަރާމަށް ވަގުތުކޮޅެއް
ހޭދަކުރުމަށާއި އުފަލުގެ ޝުޢޫރެއް ފާޅުކުރުމަށް މުނާސަބެއް އައުމަކީ އެންމެ ހެޔޮ
ގޮތެވެ. އެހެންކަމުން މިފަދަ ދުވަހެއް ފާހަގަކުރުންވެފައިވަނީ މިއީ
މުހިންމުކަމެއްކަމުގައި ދެކެގެންނެވެ.
"މައިންނަކީ ޙާޟިރު އަދި ޖަމާޢަތުގެ އެންމެ ނުފޫޒުގަދަ އޭޖެންޓް"
އެވެ. ދުނިޔޭގައި ކާމިޔާބުކުރާ ހަމަ ކޮންމެ ކަމެއްގައި އެންމެ ފުރިހަމަ ބާރެއް
ފޯރުވާ އެއް ބަޔަކީ މައިންނެވެ. މައިދާނީ ސިޔާސީ ކުޅިވަރުގެ އަދި އެ ނޫންވެސް
ކަމެއްގައެވެ. ވީއިރު މުޅި ދުނިޔެ ކަންބޮޑުވަމުން އަންނަ ތަރުބިއްޔަތުގެ
މައިދާނާއި ބުއްދިއާއި ވިސްނުންތޫނު ޖަމާޢަތެއްގެ ވެއްޓާއި ޙިމާޔަތްތެރިކަމުގެ
ނިޒާމާއި އެ ނޫންވެސް ކަންކަމުގައި މައިންގެ ހޭލުންތެރިކަމާއި ބާރުވެރިކަން ވަރަށް
މުހިންމުވާނެއެވެ. މައިން ބުއްދިވެރިވެ ދުޅަހެޔޮވެ ޢިލްމުވެރިވެއްޖެނަމަ އެ
މައިންގެ ފުށުން މުޅި ޖަމާޢަތް ހެޔޮވެގެންދާނޭކަމީ ޝަކެއް އޮތް ކަމެއް ނޫނެެވެ.
އެހެންކަމުން މައިންނަށް މިފަދަ ފުރުސަތުތަކެއް ހޯދައިދީ އެއީ ޖަމާޢަތުގެ އެންމެ
ބާރުހުރި ވެރިއެއްގެ ރޯލު ކުޅުމަށް ޤާބިލުކަމެއް ލިބިދިނުމީ މި ފަދަ ދުވަހެއްގައި
އަޑު އުފުލައިގެން މެނުވީ ނުކުރެވޭނޭކަމެކެވެ.
"ބަދަހިވެއްޓަކާއި ޚިޔާލީ ގުޅުމަކަށް އިޙުތިރާމާއި އޯގާތެރި
މަރުޙަބާއެއްލިބޭ ދަރިފަސްކޮޅެއް ތަރުބިއްޔަތުކުރުން" ވެސް ހިމެނެނީ މި ފަދަ
ދުވަހެއް ފާހަގަކުރުމުގެ އެއް މަޤުޞަދުކަމުގައެވެ. އާދޭހެވެ. ދިރާސާތަކުން
އެނގޭގޮތުގައި މައިންގެ ފުށުން ހެޔޮ ދަރިން އުފެދި ބޮޑުވެއެވެ. ހޮޔޮމަޔަކާއި
ހިނިތުން ގުޅުމަކާއެކު ހެދި ބޮޑުވާ ދަރިންގެ ނަޔާކަން އިންތިހާއެވެ. އެ ދެބައި
އެކުވުމުން ޖަމާޢަތް އުފާވެރިވެ ފުރިހަމަ ވެށިފެހި ޖަމާޢަތަކަށް ވާނޭކަން
ކަށަވަރެވެ. މައިންގެ ދުވަހެއްގެ އެއް އަމާޒުކަމުގައި މިކަންވެގެންދެއެވެ.
"މައިން ބާރުވެރިކުރުން" އަކީވެސް މައިންގެ ދުވަހުގެ މަޤުޞަދެކެވެ.
ޝައްކެއް ނެތްގޮތުގައި މައިންނަކީ އިންސާނާ ދުނިޔެއަށް އުފަންކުރުމަށް ފަހު އެތައް
ދުވަހެއް ވަންދެން އުނގުގައި ގެންގުޅޭ މީހާއެވެ. އެ ވާޖިބުގެ ތެރޭގައި
ތަރުބިއްޔަތުގެ ފުރަތަމަ ބިންގާ އަޅައިދީފައި މެނުވީ އެއްވެސް ދަރިއެއް މި ދުނިޔޭ
ވެށީގައި ހިނގައި ނުގަނެއެވެ. ވީއިރު އެ އުނގު ބާރުވެރިކޮށް އެ އުނގަށް އިޖުތިމާޢީ
ކާނާ ލިބިގެން މެނުވީ މުޅި ޖަމާޢަތް ހެޔޮ ކުރެވޭކަށް ނޯންނާނެއެވެ. ވީމާ އެ
މައިމީހާއަށް ފުރިހަމަ ބާރާއި ނުފޫޒު ލިބެންޖެހެއެވެ. އެ ފުރުސަތު ލިބެންޖެހެއެވެ.
މި މަޤުޞަދަށްޓަކައި އުފުލަންޖެހޭ އަޑުތައް އުފުލުމަށް މިއަދުގެ މުހިންމުކަން
ބޮޑެވެ.
"މިހަށީގައި ފިރުމުމަށް ޝަކުވާއެއް ނެތި ފަށައި އެ ފިރުމުމުން ހޭހަން
ކުރަނީ މައިން" ކަމުގައިވީތީ ދުނިޔެއާއި ޤައުމާއި ދީނަށްޓަކައި ކަންކަންކުރާ
އަތެއް އެ މަންމައަށް ލިބެން އެބަ ޖެހެއެވެ. ޔޫއެންގެ މައި މަޤުޞަދުކަމުގައިވާ
އެންމެ ފުރިހަމަ ދުނިޔެއެއް މި ފަޒާގައި ޤާއިމުކުރުމަށް މައިންގެ ރޯލު ނުހަނު ބޮޑެވެ. ދުނިޔޭގެ
ފިކުރާއި އަމާޒާ އެއްގޮތަށް ކަންކަންކުރާ އެ ޢިލްމާއި ވާގިވެރިކަމަށްޓަކައި
ހުންގާނު ހިފާ މައިންނަށް ފުރުސަތު ލިބެންޖެހެއެވެ. އެ މަގު ދައްކައިދޭންވެސްޖެހެއެވެ.
މިފަދަ ދަނޑިވަޅެއްގައި މި އަޑު އުފުލެނީ މި ދުވަސް ފާހަގަކުރާތީއެވެ.
ދުނިޔޭގައި މައިންގެ އުފާވެރި ޙަޔާތް ފެންނައިރު ނުފެންނަ ފަރާތުގައި
މައިންނަށް ލިބޭ އަނިޔާގެ ވާހަކައަކީވެސް މިދުވަހު ދެކެވެން ޖެހޭނޭ ވާހަކައެކެވެ.
އަޅުންގެ ޒަމާން ނިމިދިޔަތާ ސާދަ ސައްތަ އަހަރުވީއިރުވެސް މައިން އަޅުންގެގޮތުގައި
ގެންގުޅޭތީ އުފުލޭ ޝަކުވާ މަދެއް ނޫނެވެ. ރާއްޖޭގައި މިފަދަ ކަންތައް ނެތޭ ބުނާހާ
މަދުވިޔަސް ހުރި މިންވަރު ނިސްބަތު ކުޑައެއްެވެސް ނޫނެވެ. ދިރިއުޅުމަށް އެކަށޭނަ
ކޮޓަރިއެއް ނެތުމާއި ވެއްޓެއް ގާއިމްވެފައި ނެތުމާއި ކާނާގެ ފުދުންތެރިކަން
ބަލިވުމަކީ ދިވެހި ބައެއް މައިންނަށްހުރި މައްސަލަތަކެވެ.
މުޅި ދުނިޔޭގެ ނިސްބަތުން ދިވެހި މައިންނަކީ ވަރަށް ގިނަ ފުރުސަތުތަކާއި
މިނިވަންކަމެއް ލިބިފައިވާ ބައެކެވެ. ކަންކަން ކުރުމުގެ ފުރުސަތުތަކާއި އަޑު
އުފުލައި ކަންކަން ހައްލުކުރުމުގެ ފުރުސަތުވެސް މެއެވެ. ނަމަވެސް ގިނަ
ދަރިންތަކެއް އެކަނި މާ އެކަނި ބަލައި ދެގެ ބޮޑުކުރުމުގައި އެ ކަންކަންކުރުމުގެ
އެހީތަކާއި ޖާގައާއި އިނާޔަތްތައް ނުލިބި ހިތްދަތިކަމުގައި އުޅޭ މައިން އެބަ
ފެނެއެވެ. ދަރިންގެ ބަފައިންނާއި އެ މައިންގެ ފިރިންގެ ކިބައިން އަނިޔާ ލިބެމުންދާ
މައިންވެސް ފެނެއެވެ. ދިވެހިންފަދަ ހޭލުންތެރިކަން ނިސްބަތުން މަތީ ބައެއްގެ
ކިބައިން ލިބެން ނުޖެހޭ ބޭ އިންސާފު ގައި ދިވެހި ބައެއް އަންހެނުން އެބަ އުޅެއެވެ.
މިއީ މިއަދު ފާހަގަކުރަންޖެހޭ ކަމެކެވެ.
މިފަދަ ދުވަހެއްގައި ހިއްސާކޮށްލަންޖެހޭ އަނެއްކަމަކީ ފުރުސަތު
ލިބިފައިވިޔަސް ޒިންމާތަކާ ޙަވާލުވުމުގައި ފަހަތަށްޖެހޭ މައިން ނުވަތަ އަންހެނުން
އަދިވެސް ގިނަވާވާހަކައެވެ. ކަމެއްގައި އިސް މަޤާމެއް ފުރުމަކަށް،
ފުދުންތެރިވުމަކަށް، އަދި މަސައްކަތެއްގައި ޝާމިލްވުމަކަށް، ލިބޭ އަނިޔާގެ
ޝަކުވާއާއެކު ޙައްޤު ލިބިގަތުމަށް މަސައްކަތްކުރުމަކީ އަދިވެސް ދިވެހި އަންހެނުން
ފަސްޖެހޭކަމެކެވެ.
ލޮބުވެތި މަންމައިންނޭވެ. ވިސްނަންވީ ޒަމާން ބަދަލުވެއްޖެކަމެވެ. އިހަށް
ބެއްޔަސް ލިބުނު ބާރާއި ނުފޫޒު މިއަދުވެސް އަންހެނުންނަށް އެބަ އޮތެވެ. ކެރުމާއި
ޤާބިލްކަން ލިބިގަންނަންވީއެވެ. ދިވެހިން ދަންނަންޖެހޭނީ ދިވެހިންނަކީ
މުސްލިމުންކަމާއި އިސްލާމްދީން ދީފައިވާ ހައްޤުތަކާއިގެން އުޅުމަށެވެ.
ހެޔޮ ލަފާ ޖީލެއް ބިނާކުރުމުގައި މައިން ތަޢުލީމީ ބަޔަކަށް ވާން އެބަޖެހެއެވެ.
ޒަމާނީ ތަޢުލީމާއި ތަރުބިއްޔަތު ލިބެންޖެހެއެވެ. އިސްލާމްދީން ކިޔަވައި، ދީނީ
ޢަޤީދާގެ ނަފާ ލިބިގަނެ ހެޔޮ ޢިލްމުގައި ސާބިތުވާންވީއެވެ. އަދި އިސްލާމްދީން
ދީފައިވާ ފުރުސަތުތަކާއިގެން ދުނިޔެ އާއި އާޚިރަތް ކާމިޔާބުކުރަންވީއެވެ.
No comments:
Post a Comment