އޮނިގަނޑު ރަނގަޅު މަޒުމޫނެއް ލިޔެވިދާނޭ މޮޅު އެއް އުކުޅު Mazumoonu liyun

އޮނިގަނޑު ރަނގަޅު މަޒުމޫނެއް ލިޔެވިދާނޭ މޮޅު އެއް އުކުޅު 

ތައްޔާރުކުރީ: އާދަމް ޒާހިރު.......... 5 ސެޕްޓެމްބަރު 2016 

ތަރުޙީބެއް ދެއްވުމަށް މި ބްލޮގްގެ ފޮލޯއަށް (Follow) އަށް ފިއްތަވައިލައްވާ!

ތިރީގައި މިވަނީ އެތައް ގޮތަކުން އެކި ޢުމުރުގެ ކުދިން ބައިވެރިކޮށްގެން އަޅުގަނޑު ތަޖުރިބާކޮށްފައި (ޕައިލޮޓް ހަދައިފައި) ނިންމި ނިންމުމެކެވެ. މި ގޮތަށް ފަރުމާކޮށް ކުދިން ލިޔުނު މަޒުމޫނުތައް އެސްއެސްސީ އަދި އެޗްއެސްސީ މާކަރުންލައްވައި މާކުކުރީމެވެ. ގިނަ މަޒުމޫނަށް އެ މާކަރުން ދީފައި ހުރީ 25 އިން 24 އެވެ. އެންމެ ދަށްކޮށް ދިން މާކަރު ދީފައިވަނީ 25 އިން 21 އެވެ. ވީމާ މި އުސޫލު ވަރަށް ކާމިޔާބުކަމުގައި ނިންމަމެވެ. އަތުލިޔުން ސާފުކޮށް، ޢިބާރާތްކުރުން ހެޔޮކޮށް، މުނާސަބު ލަފުޒު ބޭނުންކޮށްގެން މި މަޒުމޫނު ލިޔެފިނަމަ އެ ކުއްޖަކަށް މަދުވެގެން 24 މާކުސް ލިބޭނޭކަން ކަށަވަރެވެ. 

އިރާދަކުރެއްވިއްޔާ މި މަޒުމޫނު ލިޔެފައި އެބަ ޢާންމުކުރަމެވެ. ކިޔުންތެރިންގެ ކުދިން ލައްވައި މި މަޒުމޫނު ލިޔުއްވާށެވެ. އަޅުގަނޑުގެ މަޒުމޫނު ޢާންމުކުރާނީ ފަހުންނެވެ.

އިރުޝާދާއި މިސާލު މިވަނީއެވެ. 

ސުރުޚީ: އަހުރެންނަށް މާވަހަރެއް ލިބިއްޖެނަމަ............

 (މިއީ އެސްއެސްސީ ޕާސްޓް ޕޭޕާރގައި އޮތް ސުރުޚީއެކެވެ) 

ފިޔަވަޅު 1: ސުރުޚީ ކަނޑައެޅުނީމާ މައި ސުވާލެއް އުފައްދާށެވެ. މިސާލަކަށް މި ސުރުކީއަށް "ކިހިނެއް ހަދާނީ؟" ސުވާލު އުފެއްދިދާނެއެވެ.  މިއަށްފަހު މި ސުވާލަށް 4 ޖަވާބުދޭށެވެ. ހައެއްކަ ޖަވާބު ދިނުމަށްފަހު 4 ޖަވާބު ކަނޑައެޅިދާނެއެވެ. 

ފިޔަވަޅު 2: މައިސުވާލަށް 4 ޖަވާބު ދީ ނިމުނީމާ އެއިން ކޮންމެ ޖަވާބަކަށް ސަބަބު ހޯދޭ ސުވާލެއް އުފައްދާނީއެވެ. މިސާލަކަށް މި ލިޔުމުގައި އޮތް ފުރަތަމަ ޖަވާބަަށް "ވިއްކައިލަންޖެހެނީ ކީއްވެ؟" މި ސުވާލު ކުރެވިދާނެއެވެ. މިއަށްފަހު އެ ސުވާލަށް 3 ނުވަތަ 4 ޖަވާބެއް ދޭށެވެ. އިތުރު މިސާލު ތާވަލުގައި އެވަނީއެވެ.

ފިޔަވަޅު 3: ފިޔަވަޅު 2 ގައި ދިން ޖަވާބުތަކުގައި އެ ބުނާ ސަބަބަށްޓަކައި، ފިޔަވަޅު 1ގައި ބުނި ކަންކަން ކުރަންޖެހޭކަމުގެ ދަލީލެއް، ހެއްކެއް، މީހެއްގެ ބަހެއް، (ކޯޓޭޝަނެއް) ދިރާސާއެއް، އަމުރެއް އޮތްނަމަ އެއިން ކަމެއް ލިޔެލާށެވެ. ކޮންމެ ބަރިއަކަށް އެއް ހެއްކެވެ. މިސާލު ތާވަލުގައި އެވަނީއެވެ. 

ފިޔަވަޅު 4: ސާބިތު ކުޅަ ޙަވާލާއާ ގުޅިގެން، މައި ޖަވާބާ ގުޅޭހެން، ސުރުޚީއާ ގުޅުވައިގެން އިއްވާނޭ ނިންމުމެއް (ދޭނޭ މެސެޖެއް) ކޮންމެ މައި ނުކުތާއަކަށް ނޯޓްކޮށްލާށެވެ! 

ފިޔަވަޅު 5: ފެށުން ކަނޑައަޅާށެވެ. ތާވަލުގައި އެވާ ގޮތުން ފެށުމުގައި ދެއްކިދާނޭ ވާހަކަ އެވަނީ ކަނޑައެޅިފައެވެ. ސުރުޚީއާ ގުޅުވައިގެން ކޮލަމް 1 ގައި ހުރި ހުރިހާ ވާހަކަ (މައިގަނޑު ޖަވާބުތައް) ތަޢާރަފުކޮށް ފެށުން ލިޔެވޭނެެއެވެ. އެ ފެށުން ނަލަ ކުރުމަށް ރީތި ބައިތެއް، ނޫނީ ބުނުމެއް، (ކޯޓޭޝަނެއް) ނޫނީ އެފަދަ ލިޔުމެއް ހިމެނިދާނެއެވެ. 

ފިޔަވަޅު 6: ނިންމުން ކަނޑައަޅާށެވެ. މި ތާވަލުގައި އޮތްގޮތުން ކޮލަމް 4 ގައި ހުރި ވާހަކަތައް ހިމަނައިގެން ޚުލާސާއެއްކަމުގައި ވާގޮތަށް ނިންމުން ލިޔެވިދާނެއެވެ. އަދި މި ނިންމުން ލިޔާއިރު ފުރިހަމަކޮށްލުމަށް ދުޢާއެއް، އެދުމެއް، ގޮވައިލުމެއް ފަދަ ބައެއް ހިމެނިދާނެއެވެ. ސުރުޚިއާ ގުޅޭގޮތުުން ޖުމުލަ ނިންމުމެއް (މެސެޖެއް) ދެވިދާނެއެވެ. މި ސުރުޚީއަށް ޖުމުލަ މެސެޖެއްކަމުގައި "އަޅުގަނޑަށް މާވަހަރެއް ލިބިއްޖެނަމަ އިސްވެ ބަޔާންކުޅަ ފަދައިން ބޭނުންތެރިގޮތެއްގައި ބޭނުން ހިފާނަން" މި ފިކުރު ލިޔެވިދާނެއެވެ. 

ފިޔަވަޅު 7: ދެން މަޒުމޫނު ލިޔާށެވެ. މިއީ 6 ޕެރެގުރާފުގެ މަޒުމޫނެކެވެ. ޖުމުލަކޮށް 7، 6 ފޮޅުވަތުގެ ޕެރެގުރާފު ލިޔެވޭނެއެވެ. މިހެން ލިޔެފިނަމަ 36 ފޮޅުވަތް، 42 ފޮޅުވަތުގެ މަޒުމޫނެއް ލިޔެވޭނެއެވެ. 

މުޅި އޮނިގަނޑުގެ މިސާލު:

ފިިޔަވަޅު1: ފުރަތަމަ މައި ސުވާލަށް ދިން 4 ޖަވާބު.	ފިޔަވަޅު2: ޖަވާބުތަކުން އުފެއްދި ސުވާލުގެ ޖަވާބުތައް	ފިޔަވަޅު 3: ސާބިތުކުރާ ޙަވާލާއެއްފަދަ މަޢުލޫމާތެއް	ފިޔަވަޅު 4: ނިންމުން، މެސެޖް
1.     އެ މާވަހަރު ވިއްކައިލާނީ	-          ވިއްކައިލުމުން ގިނަ ބޭނުންކުރެވޭނެ -          އަވަހަށް ހުލިވެދާނެތީ -          އެހެން މީހުންވެސް ކަންކުރަނީ މިހެންކަމުގައިވީތީ	ވޭތުވެ ދިޔަތަނުގައިވެސް ގިނަ މީހުން އެކަން ކޮށްފައި އޮތީ މިގޮތަށް (2015 ގެ ހިސާބުތައް)	ލިިބިއްޖެނަމަ އެ މާވަހަރު... ފައިސާއަށް ބަދަލުކުރާނަން
2.     ލިބޭ ފައިސާއިން ޞަދަޤާތްކުރާނީ	-          ދީނުގައި އަމުރުކޮށްފައިވާ ކަމަކަށް ވީތީ -          ފުދުންތެރިކަމެއް ލިބުމުން ޖަމާޢަތަށް އެހީވާންވާނެތީ -          ލިބުނު އުފަލުގައި އެހެން މީހުން ބައިވެރިކުރުމަށް	ޙަދީސަކާ ގުޅުވުން (ލިބޭ އެއްޗަކުން ޞަދަޤާތްކުރަން އަންގަވާ)	އަނެކުންނަށް އެހީއެއްގެގޮތުގައި ބައެއް ކަނޑައަޅާނަން
3.     އިޖުތިމާޢީ ކަމަކަށް އެހީވާނީ	-          ޖަމާޢަތުގައި ނުކުރެވި ހުރި ކަންކަން އެބަހުރި -          އެ ކަންކަމަށް އެހީވާން ޖެހޭނެ ލިބޭ މީހުން -          އަޅުގަނޑުގެ ވެށި އަޅުގަނޑަށް ދިރުން ދޭނެ -          މިއީ ލިބޭ އުފަލެއްކަމަށްވީތީ	ހަރު މީހެއްގެ ބުނުމެއް (ޝިހާބު ވިދާޅުވެފައިވޭ.....)	ޖަމާޢަތުގައި ނިންމަންޖެހިފައި ހުރި ކޮންމެވެސް ކަމަކަށް އެހީވަނަން
4.     އަޅުގަނޑު ޙައްޖަށް ދާނީ	-          އެވަރަށް ފައިސާ ލިބުމުން ކުރަންޖެހޭ ދީނީ ކަމަކަށްވީތީ -          ލިބުނު ފުރުސަތުގެ ބޭނުން ހިފަންޖެހޭނެތީ -          ބައްޕަގެ ނަސޭހަތަކަށްވީތީ	ދީނުގެ ބަސް (ފުދުންތެރިކަން ލިބޭއިރަށް ޙައްޖު ފަރުޟު)	ދީނުގެ މަތިވެރި ފަރުޟު އަދާކުރާނަން

ﷲ އިރާދަކުރެއްވިއްޔާ މިއީ ފަސޭހަ މަގެއްކަމުގައިވާނޭކަމަށް އުންމީދުކުރަމެވެ. މި ލިޔުން ކިޔުއްވާ ބޭފުޅުން ކޮންމެވެސް ޚިޔާލެއް (ކޮމެންޓެއް) ކޮށްލެއްވުން އެދެމެވެ. (ނިމުނ)