ނަކަލީ މަޒުމޫނެއް: އަހުރެންނަށް މާވަހަރެއް ލިބިއްޖެނަމަ............ Namoonaa Mazumooneh

ނަކަލީ މަޒުމޫނެއް: އަހުރެންނަށް މާވަހަރެއް ލިބިއްޖެނަމަ............

އާދަމް ޒާހިރު (ކުރޮޅި) 10 ސެޕްޓެމްބަރ 2016

      ނިޢުމަތްތަކެއް  މިންވަރުފުޅުން   ލިބިދާހިނދުން  ވިސްނަންޖެހޭ

                              ނިޢުމަތް ތަކުން ފާސްވާން އޮތީ ކޮންކޮން  މަގެއް މަހިނގަންޖެހޭ

ޝައްކެއް ނެތެވެ. ނިޢުމަތް ދެއްވަނީ ﷲ އެވެ. އެއީ އިމްތިޙާނެކެވެ. އެހެންކަމުން އެ ނިޢުމަތް ލިބުމާއެކީ ފުރަތަމަވެސް ވިސްނަންޖެހެޭނީ އެ ނިޢުމަތް ބޭނުންކުރަންޖެހޭ އެންމެ ރަނގަޅުގޮތަކީ ކޮބައިތޯއެވެ. އެހެންކަމުން މާވަހަރެއް ލިބުމުންވެސް މި ކަމަށް ވިސްނަންޖެހެއެވެ. 

އެއްވެސްގޮތަކުން އަޅުގަނޑަށް މާވަރެއް ލިބިދާނެބާވައެވެ؟ ލިބިއްޖެނަމަ ހަދާނީ ކިހިނެއް....ބާވައެވެ. އާދޭހެވެ. އަޅުގަނޑަށް މާވަހަރެއް ލިބިއްޖެނަމަ ކުރާނޭ ކަންކަން ބައިވަރެވެ. ނަމަވެސް އެންމެ ފުރަތަމަ އެ މާވަހަރު ވިއްކައިލެވޭތޯ ބަލާނަމަވެ. އަދި އެއިން ލިބޭ ފައިސާއިން ޞަދަޤާތްކުރާނަމެވެ. ވެގެން ވިއްޔާ ހެޔޮ މަގަކުން ކޮންމެވެސް ކަމަކަށް އެހީވާނަމެވެ. އަދި ކޮބައިތޯއެވެ. ހަމަ ގައިމުވެސް އަޅުގަނޑު ޙައްޖަށް ދާނަމެވެ. މި އީ "އަހަރެންނަށް މާވަހަރެއް ލިބިއްޖެނަމަ...." ކުރަން ވިސްނާ ކަންކަމެވެ.

މި ޒަމާނުގައި ފައިސާއިން ނޫނީ ގިނަ ކަންކަން ނުކުރެވޭނޫންހެއްޔެވެ؟ އެހެންކަމުން، ﷲގެ ރަޙުމަތުން އަޅުގަނޑަށް މާވަހަރެއް ލިބިއްޖެނަމަ ވީ އެންމެ އަވަހަކަށް ރަނގަޅު އަގެއްގައި ވިއްކައިލާނީއެވެ. އެހެނީ ގިނަ ބޭނުންތައް ކުރެވޭނީ އެ "ޖަވާހިރު" ވިއްކައިލައިގެންނެވެ. އަދި ވިއްކައިގެން ލިބޭ ފައިސާއިންނެވެ. ނުވިތާކަށް އެ ބާއްވަން ވެއްޖެނަމަ ހުލިވެދާނެތީވެސް މެއެވެ. އޭގެ އަގު ދަށްވެދާނެތީއެވެ. ނުވިތާކަށް އެހެން މީހުންވެސް ކަންކުރަނީ މިހެންކަމުގައި ވީތީއެވެ. 2015 ވަނަ އަހަރުގެ ހިސާބުތަކުން އެނގޭގޮތުގައި އެ އަހަރުގެ ފެބުރުއަރީއިން ނޮވެމްބަރުގެ ނިޔަލަށް ރާއްޖެއިން 13 މީހަކު ހޮވި 16 މާވަހަރެއްވެސް ވަރަށް އަވަހަށް ވިއްކައިލައިފައިވެއެވެ. އެހެންވީމާ ލިބޭ މާވަހަރު ފައިސާއަށް ބަދަލުކޮށް ބޭނުންކުރުމަށް އަވަސްވެގަންނާނަމެވެ. 

އަޅުގަނޑަކީ ލިބޭ އެއްޗަކުން ޞަދަޤާތްކުރުމަށް އިސްކަންދޭ މީހަކީމެވެ. އެހެންކަމަށްވީތީއާއެކު މާވަހަރުން ލިބޭ ފައިސާއިން، ދީނުގައިވާމަގުން ޞަދަޤާތްކުރުމަށް މި ހިތުގައި ނިޔަތް އެބަ އޮތެވެ. އެހެނީ ދީނުގައި މިކަމަށްވަނީ އަމުރުކުރައްވައިފައެވެ. ފުދުންތެރިކަމެއް ލިބުމުން ތިމާގެ އަވަށްޓެރިންނަށް އިސްކަން ދީގެން ފަޤީރުންނަށް ޞަދަޤާތްކުރަންޖެހޭވެސްމެއެވެ. ތިމާއަށް ލިބުނު އުފަލުގައި އެމީހުންވެސް ބައިވެރުކުރުމަށެވެ. އިސްލާމް ފޮތްތަކުގައި ހުރި ރީތި އާދަތަކާ ގުޅޭ ޙަދީސްތަކުންވެސް އެނގޭގޮތުގައި ތިމާއަށް ލިބޭ އެއްޗަކުން ނިކަމެތިންނާއި ފަޤީރުންނަށް ޞަދަޤާތްކުރުމީ މާތް ސިފައެކެވެ. ހަރު ބުނުމެއްގައިވާފަދައިން މުށުން ކާން އެދޭ ފަރާތްތަކަށް ކާންދޭންވާނެއެވެ. އެހެންކަމުން އިރާދަކުރެއްވިއްޔާ މާވަހަރުން ލިބޭ ފައިސާއިން ޞަދަޤާތްކުރަން ބައެއް ކަނޑައަޅައި އެކަން ކުރާން މި ނިންމީ މި ސަބަބުތަކަށްޓަކައެވެ. 

ކޮންމެ މީހަކުސް ތިމާ އެ ޖަމާޢަތެއްގައި، އެ ވެއްޓެއްގައި ހިމެނިފައިވާ ވެއްޓަށް އެހީވުމީ ކުރަންޖެހޭނޭ ކަމެކެވެ. މި ވާޖިބަށް ވިސްނައިގެން، އަޅުގަނޑަށް މާވަހަރެއް ލިބިއްޖެނަމަ އަޅުގަނޑު ހިމެނޭ ޖަމާޢަތަށް ނުވަތަ ރަށަށް، ނުވަތަ އަވަށަށް ބޭނުންވެފައިވާ ކަމަކަށް އެހީވާނަމެވެ. އެ ޖަމާޢަތުގައި ނުކުރެވި ހުރި ކަމެއް ބަލައި ފައިސާއިން އެހީވާނަމެވެ. އެ ކަންކަމަށް އެހީވުމީ ވާޖިބެއްކަމުގައި ދެކޭނަމެވެ. އަޅުގަނޑުގެ ވެށި އަޅުގަނޑުގެ މި އެހީއިން ދިރުވޭތޯ ބަލާނަމެވެ. މިއީ އުފަލެކެވެ. އުސްތާޛު އިބްރާހީމް ޝިހާބު، އެމަނިކުފާނުގެ މަޒުމޫނުތައް 1 ގައި ލިޔުއްވައިފައިވާގޮތުން، ލިބޭ މީހުން އެމީހުންގެ ޤައުމާއި ރަށާއި ޖަމާޢަތަށް އެހީވެ ކުރިއެރުމަށް މަސައްކަތްކުރަންވާނެއެވެ. އެހެންކަމަށްވީތީ އަޅުގަނޑުގެ އަވަށްޓެރިންނާއި ޖަމާޢަތަށް އެހީވުމީ އަޅުގަނޑު ކުރާނޭކަމެކެވެ. 

ޝައްކެއް ނެތެވެ. އެންމެ އިސްވާޖިބަކީ ﷲ އަށް އަދާކުރާންޖެހޭ ފަރުޟެވެ. އެހެންކަމަށްވީތީ އަޅުގަނޑަށް ލިބޭ ތިޔާގިކަމުގެ ބޭނުންކޮށްގެން، ﷲ ފަރުޟުކުރެއްވި ޙައްޖުގެ މަތިވެރި އަޅުކަން އަދާކުރަން މިހާރުވެސް މި ނިޔަތްގަތީއެވެ. އެއީ އެކަން އަދާކުރެވޭނޭ މިންވަރަށް ފައިސާ ލިބިއްޖެނަމަ ކުރަންޖެހޭ ވާޖިބު އަޅުކަމެކެވެ. އަދި އެއީ ލިބޭ ފުރުސަތެއްކަމުގައި މި ހިތް ދެކެއެވެ. މިހާރުވެސް ހަނދާނުގައި ހުރި، އަޅުގަނޑު ކިޔަވާން ސާނަވީއަށް ދާންފެށުމުން ބައްޕަ ދެއްވި ނަސޭހަތެއްވެސްމެއެވެ. ތަޢުލީމުއްދިޔާނާގައި އޮތްގޮތުން އިސްލާމްދީނުގެ 5ވަނަ ފަރުޟު އަދާކުޅައުމުގެ ކުޅަދާނަކަން ލިބުމާއެކު އެ އަޅުކަން އަދާކުރުމީ ކޮންމެ މުސްލިމެއްގެމައްޗަށް ވާޖިބެކެވެ. ވީމާ އަޅުގަނޑަށް މާވަހަރެއް ލިބި ވިއްކައިލެވުނުހާ އަވަހަކަށް މި ކަމަށް ފައިސާ ވަކިކޮށް ޙައްޖުގެ ދަތުރު ފަށާނަމެވެ. 

ނިންމައިލަމުން ދަންނަވާނީ މާވަހަރެއް ލިބި ތިޔާގިކަމެއް އޮތްނަމަ އަޅުގަނޑު ކުރާނެ ކަންކަން ޢަޒުމާ އެއްގޮތަށް ކުރާނެވާހަކައެވެ. ކޮންމެވެސް ގޮތަކުން ލަފާ ހޯދައިގެން، ލިިބުނު އެ މާވަހަރު، ވީ އެންމެ އަވަހަކަށް ފައިސާއަށް ބަދަލުކުރާނަމެވެ. އަދި ލަސްނުކޮށް އަނެކުންނަށް އެހީއެއްގެގޮތުގައި، އެ ހިނދަށް ބޭނުންވާ ކަންކަމަށް އެ ފައިސާއިން ބައެއް ކަނޑައަޅާނަމެވެެ. ޖަމާޢަތުގައި ނުނިމި ހުރި ކޮންމެވެސް މުހުތާދަކަށް ހޭދަކުރާނަމެވެ. ތިމާއަށް ތިޔާގިކަމެއް ލިބިއްޖެއަތީ އަދާކުޅައުމަށް އޮތް ދީނުގެ މަތިވެރި ޙައްޖުގެ ފަރުޟު އަދާކުރާނަމެވެ. އަޅުގަނޑު އެދެނީ އެހެންމީހުންވެސް، ތިޔާގިކަމެއް ލިބިއްޖެނަމަ މިފަދަ ކަންކަންކުރުމެވެ. ﷲ އަޅުގަނޑަށް މި ކަންކަންކުރުމުގެ ތިޔާގިކަމެއް ދެއްވާށިއެވެ. އާމީން. (ނިމުނީ)