ޅެން ޝަރަޙަކުރާނެގޮތެއް! އަވަހަށް "ގެޓް" ކޮށްދީ Lhen Sharaha Avahah "Get"kohdhee

ޅެން ޝަރަޙަކުރާނެގޮތެއް!

އަވަހަށް "ގެޓް" ކޮށްދީ

އާދަމް ޒާހިރު (2018 އޮގަސްޓް)

މި ހައިރާކީގެ ފަހަތުން ހިނގައިލާ! އެންމެ 13 މިނިޓް.!

އިރުޝާދާއި އަމުރު	މިސާލާއި އެހީ
1-   މި ބައިތު ލަފުޒުތަކަށް ހުއްޓަމުން 5 ފަހަރު ކިޔައިލާ! (ހޭދަވާނީ 1.5 މިނިޓްވަރު)	ކޮންފަދަ ނަސީބެއްތޯއެ މީ     ދޮންވެލި ބިމެއްގައި ލެއްވުމީ        ހަންހާރަވެތި ދިވެހިންގެ މީ              ގިންތީތެރޭ  ހިމެނުއްވުމީ
2-   ބައިތުން ބުނެދޭ އެެއްޗެއް ޚިޔާލަށް ގެނޭ... ދެތިންގޮތުންވެސް.. (ހޭދަވާނީ 2 މިނިޓްވަރު)	ނަސީބެއް/ މި ދޮންވެލި ބިމުގައި ލެއްވިކަމީ/ މިއީ ހަންހާރަވެތި ތަނެއް/ ދިވެހިންގެ/ މި ގިންތީގައި ހިމެނުނީތީ
3-   ބުނުމުގެ، ޖުމުލަ ފިކުރެއް ނަގައިގަނޭ... ވިސްނައިލާ... އަދި ދުލުން ކިޔައިވެސްލާ!. (ހޭދަވާނީ 30 ސިކުންތުވަރު)	މި ހަންހާރަވެތި ދޮންވެލި ބިމުގައި، މި ދިވެހިންގެ ގިންތީގައި ލެއްވިކަމީ ވަރަށް ބޮޑު ނަސީބެކެވެ.
4-   ބުނުމަށް ތާއީދުކޮށް ނުވަތަ ނުކޮށް ބުނާނޭ ދެ ބުނުމެއް ކުރުކޮށް ވިސްނައިލާ! (30 ސިކުންތުން)	ވަރަށްވެސް ބޮޑު ތެދެއް.. މުހިންމު ވާހަކައެއް.... ވިސްނައިލަންޖެހޭ ޙަޤީޤަތެއް.... (މިފަދަ ގޮތަކަށް)
5-   ޖުމުލަ ފިކުރުގައި ހުރި ބައެއް ނުކުތާތަކުގެ މާނަ ދެ ބުނުމަކުން ބުނެވޭތޯ މަސައްކަތްކުރޭ! (1.30 މިނިޓް)	ހަންހާރަވެތި: ރިވެތި، ހިތްގައިމު، ނަލަ، ލޯބި ދޮންވެލި ބިން: ސާފުބިން، ދޮންވެލީގެ ބިން، ހިތްހަމަޖެހޭ ބިން، އެވަރެއް ނެތް ބިން ގިންތި: މި މީހުން، މި ދިވެހިން، މި ޖަމާޢަތް ލެއްވިކަމީ: އުފަންވުން، ދުނިޔެއަށް އައުން، އުޅެން ލިބުން، އެކުގައިވުން ބޮޑު ނަސީބެއް: އުފަލެއް، ހިތްހަމަޖެހުމެއް، ވުން އެދޭކަމެއް.
6-   އެނގުނުކަންކަން ސާބިތުކުރުމަށް ދޭއް ނުވަތަ ތިން މިސާލު ކުރުކުރުކޮށް ވިސްނައިލާ! (30 ސިކުންތު)	ކޮންމެ ރަށެއްގެ ވަށާދޮންވެލި... ސާފު ޗާލު ރަށްތަކެއް... އެއް ދީނެއްގެ ވެރި ބައެއް... އެކުވެރި އެއް ނަސްލެއްގެ ޖަމާޢަތެއް.
7-   ކުރެވިދިޔަ ކަންކަން ތިޔައޮތީ ސާފުވެ އޮޅުންފިލައިފައި. ޅެންބައިތުގެ މާނަވެސް ތިޔަވަނީ އެނގި ދަސްވެފައި. އަދި އިބާރާތްތަކުގެ ފިކުރުވެސް ތިޔަވަނީ ހޯދިފައި. ދެން އަވަހަށް ޢިބާރާތްތައް ގުޅި ލާމެހިގެން ދާނޭހެން އެކުލަވައި ޕެރެގުރާފެއް ލިޔެލާ! އޭރުން ލޯމަތީ އޮންނާނީ ޅެންބައިތުގެ ޝަރަޙައެއް.... އުފާކުރޭ! ފޮޅުވަތެއް ލިޔެވޭނެ 30 ސިކުންތުން. 10 ފޮޅުވަތް ލިޔެވޭނެ 5 މިނިޓުން. ކުރިން ދިޔަ މަސައްކަތަށް ހޭދަވާނީ 5 މިނިޓްވަރު. ޖުމުލަ 10މިނިޓުން މި މަސައްކަތް މި ނިމުނީ. އަލުން ޗެކުކޮށްލަން 3 މިނިޓް ހެދަކޮށްލާ! ތިރީގައި އެ އޮތީ މި މި ފިޔަވަޅުތައް އަޅައިގެން ލިޔެވޭނޭ ޝަރަޙައެއްގެ މިސާލެއް!

މި މަސައްކަތް ފުރިހަމަވުމުން ލިޔެވޭނެކަމަށްބެލެވޭ ޝަރަޙައެެއްގެ މިސާލެއް:

ވަރަށްވެސް ބޮޑު ތެދެކެވެ. މި ހަންހާރަވެތި ދިވެހިރާއްޖޭގައި މި ދޮންވެލި ބިމުގައި، މި ދިވެހިންގެ ގިންތީގައި ލެއްވިކަމީ ވަރަށް ބޮޑު ނަސީބެކެވެ. ހެޔޮ ނިޢުމަތެކެވެ. މިރާއްޖެއާއި މި ދިވެހި ނަސްލަށް ބަލާނަމަ މިއީ ޤަބޫލުކުރެވޭ ހެޔޮ ނަސީބެކެވެ. ކީއްވެތޯއެވެ؟ މިއީ ކުދިކުދި ރިވެތި، ހިތްގައިމު ރަށްތަކެކެވެ. އެއް ބަހަކުން ވާހަކަދައްކާ ރައްޔިތެއް ދިރިއުޅޭ ޤައުމެކެވެ. ކޮންމެ ރަށަކީ ސާފު ދޮންވެލީގެ ބިމެކެވެ. ކޮންމެ ރަށެއްގައިވަނީ ހިތްހަމަޖެހޭ ވެއްޓެކެވެ. ޤައުމުގައިވަނީ އެއް ނަސްލެކެވެ. އެއް ދީނެއްގެ އުންމަތެކެވެ. ﷲގެ ރަޙުމަތާއެކު އަޅުގަނޑު އުފަންވީ، ދުނިޔެއަށް އައީ މި ބިމަށެވެ. ދިވެއްސެއްގެގޮތުގައެވެ. ދިރިއުޅެނީ މިބިމުގައި މި ގިންތީގައެވެ. މިދިވެހިންގެ ތެރޭގައެވެ. އެއް ދީނެއްގެ މި ޖަމާޢަތުގައި ލެއްވިކަމީ  ބޮޑު ނަސީބެއް ނޫންތޯއެވެ؟ އުފަލެއް ނޫންތޯއެވެ؟ އާދޭޖެވެ. ނަސީބެކެވެ. އުފަލެކެވެ. (ނިމުނީ)

މި ބައިތަށް ޝަރަޙައެއް ލިޔެވިދާނޭ އިތުރު ގޮތެއް:

އެއްވެސް ޝައްކެއް ނެތެވެ. އަޅުގަނޑުމެން ފަދައިން ޅެންވެރިޔާ އެ ސިފަކުރައްވަނީ މި ދިވެހި ފަސްގަނޑުގައި އޭނާ ލެއްވި ލެއްވުމަށެވެ. ވިދާޅުވަނީ މި ހަންހާރަވެތި ދިވެހި ދޮންވެލި ބިމުގައި، މި ގިންތީގައި ލެއްވިކަމީ ވަރަށް ބޮޑު ނަސީބެއްކަމުގައެވެ. މި ބިމުގެ ހަންހާރަވެތިކަމާއި ރިވެތިކަމާއި މި ވެލިގަނޑު ސާފުކަން ސިފަކުރައްވައި މި ބިމުގައި ލެއްވި ލެއްވުމަކީ ނަސީބެއްކަމުގައި ވިދާޅުވެއެއެވެ. ދަންނާށެވެ. މި ދިވެހިރާއްޖެއަކީ އަމާން އޮމާން ގުޅުން ނަލަ ހަންހާރަވެތިކަމެއް ލިބިފައިވާ އެއް ދީނެއްގެ އަހުލުވެރި ނަސްލެއް ދިރިއުޅޭ ތަނެކެވެ. މިތަނުގައި ވަނީ ސާފު ޗާލޫ ބިމެކެވެ. ދޮންވެލިގަނޑެއްގެ ނަލަ ބެބުޅުމާއި ރިވެތިކަމެވެ. މިފަދަ ތަނެއްގައި ލެއްވުމީ ހަމަ ގައިމު ބަޔަކު އެދޭނޭ ކަމެކެވެ. މި އުފާވެރިކަމުގައިވުމީ އުފަލެއްކަމުގައިވާނެއެވެ. ވީމާ ޅެންވެރިޔާ އެ ސިފަކުރައްވަނީ އަޅުގަނޑުމެން ދިވެހިން މި ވެށީގައި ލެއްވި ލެއްވުމުގެ ނަސީބުވެރިކަމުގެވާހަކައެވެ. (ނިމުނީ)