ޤައުމީ ދުވަސް ބަނދި Kurolhi Ban'dhi Lhen Qaumeedhuvas

ޤައުމީ ދުވަސް

އާދަމް ޒާހިރު (ކުރޮޅި)

ފާނުތަކުރުގެ ލެއިން
ޖާނުދީ އެކު ތިން ބެއިން
ޔާރުނާ އެކު ކަނޑުމަތިން   
ހާލުދެކި ރަށު އެކުވެރިން
ވާތި ހޯދި މަތިވެރި ނަސްރު
ރާއި ދައިގައިވި ނަސްރު

ތީމުއު ރަދުންއެއީ   
ވީޅަފަތު ރަށު ޤަދަރުވީ
ވީހުސައިން ދަރި ބުއްދިވީ
ތީހިތުގެ ފުން ލޯބިވީ   
ވީއެ ތަރުބަވެތިކަމު ތެރޭ   
ވީހެޔޮއުޅުމުގެ ތެރޭ 


ސޯޅައަހަ ރުގެ އަނިޔާ   
ޕޯޗުގީ ޒުން ދިންމިތާ       
ލޯ ހުޅުވި ބޮޑު ތަކުރުމާ
ހޯދުމަށް ގޮތެއް ފެށިޔާ
ބޯކަނޑައި މެފައްސައިލާނޭ
ތޯހަވަރު ނެރެލާނޭ

   
ސަނަތުނުވައަށުއެކެއް   
ވަނަ ހިޖުރަ އަހަރުން ތެދެއް   
ބަނަ ރަބީޢުލް އައްވަލެއް
ކަނައަށްހަމަ ނުދީ ތަނެއް
ބަނަކޮށް ހަމަލާ ދިން ފަތިސް       
ގަނަ ބަލިކުރީ ފަތިސް


ޤައުމީ މަތިވެރިނަމުން   
ފައުޅުކޮށް ކީ މާފަހުން   
އައުކޮށް އަދި ހަނދުމަކުރުން
އައުކުރީ ޤައުމުގެ އަމީން
ހައުޅުންފެހި މިދުވަސް ކިޔޭ   
ޤައުމިއްޔަތު އެދި ކިޔޭ

ވޭނާރިހުން ދިން އެ ފަތިސް ގެއްލުނީއެވެ. Kurolhi Lhen Veynaa rihun dhin e fathis

ވޭނާރިހުން ދިން އެ ފަތިސް ގެއްލުނީއެވެ.

އާދަމް ޒާހިރު (ކުރޮޅި)

އެއްރޭ  ނިކަން  ފިނި  ފަތިހުގައި   ރޫހެއް ހަހަރު   ބައްދަލުވިޔޭ

                             ހެއްވައި ލުމަށް  ފަހުގައި  އެކަށް  ރަފުޖީ  މަށަށް   ގެއްލިއްޖެޔޭ

ވީގޮތް  މަގޭ  ގުޒުރާފުޅަށް މި   ކިޔައިދެނީ     ފިތް ހުއްޓުމުން

                             ހީވީ ގޮތަށް   އެއްފަހަރު ވެސް   ހިތަކަށް ލިބުން  އެދިގެން ތެދޭ

ގަސްތުން ބުނީއެ   ގޮވައިލުމަށް  ދެބަ  ދޭތެރޭ   އިންދައި  މަގޭ

                             ވަސްވާހުގައި ވީ އުފަލަކުން    ވިންދަށް  ފަތިސް   އަތުވެއްޖެޔޭ

ވަގުތައް ބަލައި   އޮވެފައި އަޅާ  ހިތް  ނިޔަތުގައި  ކޮށްފައި ދުޢާ

                             ވަގުހެން  ގުދަށް އޮވެ ގޮސް ދޮރުން ވަދެފައި  ގޮވީ ރުހިގެން ތެދޭ

ފެނުމުން  ޕަރީ އޮތްގޮތް  ލޮލަށް   ބައްޓަން  ނަލަވި ހުރިހާ ވަނާ

                             ގެނުވައި ހިލަން  އެކު  ލޯލިތައް   ޖެހުނޭ ކޮޅަށް   އާހުން އެރޭ

ކުޑަވާއިނގިލި  ދިއްކޮށް  ކޮށައި  އެ ޕަރީ  ކޮޅަށް ތެދުކޮށް ހަދައި

                             ކުޑަ ހިނދުކޮޅެއް  ނުވަނީސް ޕަރީ  ބަލަ ދާން ދޮށަށް އަތުވެއްޖެޔޭ

ހާކޮށް ދެފިޔަ އެދުނޭ އެކަށް  އެ ދަށަށްމެ ދާން ހަށިގަނޑު ވެޝޯޚް

                             ވާ ގޮތް ބަލައި  ވީ  އުފަލަކުން  ބައްދައިލެވުނު  އެހިދަށް  ތެދޭ

ހަން ހުރަހަކަށް ވިސްނުން ވެގެން މާދުރުދުރަށް  އެ ޕަރީ މެ ގޮސް

                             ދަންވަރުތެރަށް   އޮބި  ގެއްލިދާ   ހުވަފެންކަމަށް  ބަލަ ވެއްޖެޔޭ

ދުވަހަކު  މަގޭ  ދިރިވާހިނދަކު  އެ ފަތިސް ހިލައި   ނުފިލާނެޔޭ

                             ހުވަ ވުން ނެތޭ  ލީ ފާރުގަނޑު   ރަހަވެސް ހިލައި   ނުފިލާނެޔޭ

ގަސްތާ ނުލައި  އައި ޖާޒުބީ    އެ ރަނާ ޕަރީ  އެކުގައި  ފިލައި

                             ފަސް މުށުތެރަށް ގޮސްގެން ފަނާ  ވެވި ދިޔަގޮތެއް  އަދު ނޭނގުނޭ

އެ ހިތުން ފެނުނު ވިންދެއްވިޔަސް އެ އަތުން ދެވުނު ޚިދުމަތް ވިޔަސް

                             އެހިއަށް ދެލޯ އެދިގެން  ބަލައި   ބުނެވެން  އޮތީ  ހިތް  އަތުލިޔޭ

އަސްތާ މަގޭ މި  ޙަޔާތުގައި    އެވަރުގެ ކަމެއް   އަދިއެއް  ނުވޭ

                             ފަސްދާނުގައި ވެޑުވެން ވިޔަސް  ފަތްފުށް  ހިތުން  ފިލުމެއް  ނުވޭ

ހުވަފެންތަކެއް އެތަކެއް   ފެނުނު   އަސަރާއި ވޭން ފަދަ  ހުއްޓިދާ

                             ހުވަފެން މިވަރު އަސަރެއް ހިލުނު   ހަމަ ކަށަވަރޭ   އަމުދުން ނެތޭ

އެކުގައި އެވީ ހަ ސިކުންތު  ވެސް   އާރެއް ހިގާ  ފަތިހަށް ވެގެން

                             މެކުހަށް ފިކުރު ޖައްސައި ނިދުން  އެކުގައި    ހަރަމްކޮށްލައި ފިޔޭ

ހުރިހާ  ކަމެއް  ނިމުމާއެކީ       ގުޅުމަށް   މަލަރު ޖެހުމާ އެކީ

                             ފުރިގެން  އަސަރު ހިލި އައި ހިނދުން  ޓާޓާ އެކީ ގޮތް  ރޮއްވިޔޭ

ވި ޚިޔާލުތައް އެއްގޮތް ވެފައި  ވި  ހަޔާތުވެސް  އެއް  މިންވެފައި

                             މި ޚިލާފުކަން  އައިގޮތް  ބަލައި  މި ލޮލުން  ކަރުނު ހިލުވައިފިއޭ

ދެން ފަތިހަކުން ފެނުނަސް ނަޒަރު ބެލުމަށް  މަށަށް ކުޅެދުން މަރައި

                             ފެންކަޅި ކަމެއް  މިލޮލަށް ޚަލަލު   އެކުގައި  ތެދޭ  ގެނުވައި ފިޔޭ

ދީނީ  ފަތެއް  ފިކުރަށް  ފުރޮޅި   ވޭނާ  ތުރާ  ކުރަހައ ި ވިކައި

                             ވީހާ އުދާސް  ހާސް  ބައްޔަކަށް    އެކުގައި  ހަދައި ވަކިވެއްޖެޔޭ

ލޯތްބެއް ވިޔަސް ފައި ދަށު މެލައި  ފިކުރާ ޢަޒުމް ކޮށްލީ އެ ޗިސް

                             ލޯތްބާ  އެކީ ފޮރުވައި  އެދުނު  ބަހަކުން ޖަހައި  ދުއްވައި  ލިޔޭ

ވީ ގޮތް  މިއޭ  މާ ކުރިއަކުން  ލީ ހިތް   ނުކެރި  ގާކޮށް މިއަދު

                             ވީ ދަނޑިވަޅުން  ބުނެފައި   ދުލުން   ވީމާ ނުކެރި  ދުރުކޮށްލިއޭ

ދެން ވާގޮތެއް ނުބަލައި  ހުރުން އެދިގެން  ނަފުސު އުފަލަށް އެހެން

                             ފެންގަޑުތެރަށް  ލައި  ދޮވެ  އެކަށް    ހޫރެއްކަމަށް  ވެވިގެންފިއޭ

އިންސާނުނީ  ފިކުރަށް  އެތައް  އަސަރެއް  ހިލޭ   ބައެކޭ  ތެދޭ

                             ވިންދަށް ބެލުން  ނުބަލައި  އަމުރު  ނެރެލާ  ބައެއް މީ ހަމަ ތެދޭ

ޖިންނީންތެރޭ   ވި ޕަރީންތަކާ  ވެސް   އެއްގޮތޭ  ކަންކޮށްލުމަށް

                             ވިންދަށް ހިލުން ގެނުވައި  ފަހަށް  ގޮސް ދުރު  ބަލަން ތިބެލާނެޔޭ

މީވެސް ހިތެއް ވާ  ނަފުސަކީން   އަސަރާ ރިހުން ހިލިދާ  ވަކީން

                             ވީ ގޮތް އެނގިމެ  ގޮވިޔަސް  އަރުން  ނުމެލާ  ބަލައި ބައެކޭ ކެރޭ

އަސްތާ  ހިތަށް   ކޮށް ފައި  ވުމުން  ވޭނީ  އަސަރު ގިލަނާއެކީ

                             ގަސްތާ  ނުލައި  ފީނުނު  ނިދިން  ވީގޮތް   ހިތުން  ބުނެލީމުއޭ

(ނިމުނީ)

އެ ކުއްޖާ އެކި ސިފައިގައި Kurolhi vaahaka E kujjaa

އެ ކުއްޖާ އެކި ސިފައިގައި

އާދަމް ޒާހިރު (ކުރޮޅި)

އަޅުގަނޑުގެ ޅަޢުމުރުގައި ގޭތެރެއިން ފެނުނު ޖިންނި ކަމަށް ބުނެވޭ ކުއްޖެއްގެ ހިލަން އެކި ފަހަރުމަތިން ފެންނަނީ އެކި ސިފައިގައެވެ. ނަމަވެސް ބައްޕަގެ ނަސޭޙަތް ޤަބޫލުކޮށް، ގއ. ވިލިނގިލީ ޝުހައިލުބޭ ކިޔައިދީފައިވާ ގޮތަށް ކަންތައްތައްކުރެވޭތީ އެއްގޮތަކަށްވެސް ބިރެއް ނުގަނެއެވެ. ޚާއްސަކޮށް އަޅުގަނޑުގެ ބައްޕައެއް ފަދަ މާހޮއްކޮ ދޮހޮއްކޮބޭ ބުނުއްވައިފައިވާ ނަސޭޙަތުގެ ބަސްތައް ހަނދާންވާތީ އެކަމާ ބިރެއް ނުގަނެއެވެ. "އާދަމް އަކީ ޤުރުއާން ހިތުދަސްކުރާ ކުއްޖެއްނު. އަދި ތިޔައީ ޤުރުއާން ކިޔަވަން ދަންނަ ކުއްޖެއް. ގިނައިން ޤުރުއާން ކިޔަވާތި. އޭރުން ތިޔައިގެ އެއްވެސް ކަމެއްގައި ބިރެއް ނެތް. އަބަދުވެސް ﷲ އަށް ދަންނަވާ. ދުޢާކުރޭ. އިރާދަކުރެއްވިއްޔާ ޤުރުއާންކިޔަވައި ދުޢާކުރާހާ ހިނދަކު، ނުބައި ޖިންނިއަކަށް އާދަމްއާ ގާތެއް ނުވެވޭނެ" މާހޮއްކޮ ދޮހޮއްކޮބޭ ބުނުއްވި މި ބަހަކީ ތެދެކެވެ. 

އަޅުގަނޑާއި ބޭބެ އަޙްމަދު ޒާހިރާއި ކޮއްކޮ އިބްރާހީމް ޒާހިރު ނިދަނީ ގޭގެ މެދުގޭގައެވެ. ބައެއްފަހަރު ގެއަށް ޒިޔާރަތްކުރާ ބީރައްޓެހިން އެ ތަނުގައި ނިދައެވެ. ބައްޕައާއި ދޮންމަންމަ ނިދިކުރައްވަނީ އެތެރެގޭގައެވެ. އެހެންކަމުން ގޭގެ މެދުގޭތެރެ ގިނަފަހަރު އޮންނަނީ އަޅުގަނޑުމެނަށް ހުސްވެފައެވެ. އެ ތަނުގައި ޤުރުއާން ކިޔެވުމާއި ދީނީ ފޮތް ކިޔުމާއި ލިޔުން އަޅުގަނޑުމެނަށް އޮވެއެވެ. ޚާއްސަކޮށް ދެނަމާދު ދޭތެރޭ ޤުރުއަން ކިޔެވުން އޮވެއެވެ. ކޮއްކޮ ކުޑަވީމާ ކޮންމެ ރެއަކު ކިޔެވުން އޮންނަނީ ބޭބެއާއެކުގައެވެ. އޭގެތެރޭން އެއް ރެއަކު ޙައިރާންކުރުވި ކަމެއް ދިމާވިއެވެ. 

އަޅުގަނޑާ ބައްދަލުވި ޖިންނި ކުއްޖާ Kurolhi Vaahaka E kujjaa

އަޅުގަނޑާ ބައްދަލުވި ޖިންނި ކުއްޖާ

އާދަމް ޒާހިރު (ކުރޮޅި)

އަޅުގަނޑުގެ ވަރަށް ކުޑައިރުގެ ހަނދާނެކެވެ. މި ކަމެއް ހިނގިއިރު ގޯތި ވަރަށް ބޮޑެވެ. ގޭގައި ދިރިއުޅެނި ބައްޕައާއި އަޅުގަނޑާ އެއްބަނޑު އެއްބަފާ ބޭބެއާއި ކޮއްކޮއާއި ދޮންމަންމައެވެ. ގެ އަޅައިފައި ހުންނަނީ ފަނުންނާއި ދަނޑިންނެވެ. މުޅި ގެ ފަރުމާކޮށްފައިވަނީ ފެންޑާއަކާއި މެދު ގެއަކާއި އެތެރެގެއަކާއި ކުޑަކޮޓަރިއެކެވެ. ދެން ކާގެއެވެ. ގޯތިގެ މެދުގައި ބިނާކޮށްފައި ހުންނަ މިގެ ހުންނަނީ ދެފުރާޅަށް ހިޔާކޮށްފައިވާ ހިޔަލުގައެވެ. ބަދިގެ ހުންނަނީ ގޯތީގެ ދެކުނު އިރު ކަނުގައެވެ. މީގެ އިތުރަށް ގޯތިގެ އުތުރު އިރު ކަނުގައި މަގަށް ދޮރުވާގޮތަށް ދުއްކާނެއް ހުރެއެވެ. އެތަނުގައި ހުންނަނީ ބައްޕަ ވިއްކަން ގެންގުޅޭ ދަރާއި ކާއްޓާއި ވަޅޯމަހާއި ރިހާކުރާއި ދިޔާހަކުރުފަދަ އެއްޗެއްސެވެ. 

ކިތަންމެ އިހަސް ޙާޖަތްކުރަން އޭރަށް ރަނގަޅު ނިޒާމެއް ގޭގައި ވެއެވެ. ހުންނަނީ ގިފިއްޔެވެ. ވަރަށް ބޮޑު ގިފިއްޔެކެވެ. އަންދާޒާކުރެވޭ ގޮތުގައި ގޯތީގެ ހަތަރުބައިކުޅަ އެއްބައިވަރުވާނެއެވެ. އެ ގިފިލިގައި ބަނބުކެޔޮ ގަހަކާއި ކެއު ފީންޏަކާއި އަލަ ހައްދައިފައި ވެއެވެ. އަދި ހީނާފަތާއި ބޭސް ފަތް ހިނކަނދި ގަހަކާ ހުރެއެވެ. މި ގަސްތައް ހުންނަނީ ގިފިލީގެ ހުޅަނގު އުތުރު ކަނުގައެވެ. ގިފިލި ހުންނަނީވެސް ހުޅަނގު އުތުރު ކަނަށް ވާގޮތަށެވެ. 

ގިފިލީ ވަޅަކީ ވެސް ވަރަށް ޚާއްސަ ހަނދާނެކެވެ. އެ ވަޅު ރޭނީ ބައްޕަ ދޮންތުއްތުއެވެ. އުވަ ޖެހީ ބައްޕައެވެ. ކުދި ބޮޑު އަކިރިން ރާނައި ފަރުމާކުރި އެވަޅާ ވިދިގެން ބިލިގާއެއް ހުރެއެވެ. އެއީވެސް ބައްޕަ ގެ މަސައްކަތެކެވެ. ބިލިގާއަކީ އެއްޗެހި ދޮންނަން ފެނުއަޅައި ފެންލައި ހެދުމަށް ބޭނުންކުރި ތަނެކެވެ. ވަޅުގެ އުތުރުން ބިލިގާވެސް އިންވާގޮތަށް ތަޅުން ހަދައި ކުރިއަށް ތޫރިލައިފައި ހުންނަ ތަޅުމެއް އޮވެއެވެ. އެއި ވެސް ބައްޕަގެ އަތުންކުރި މަސައްކަތެކެވެ. މިތަޅުމުގައި ސިމެންތި އޮލަ ލައިފައި ހުރެއެވެ. ވަރަށް ސާފުކޮށް މި ތަންތަން ބައްޕަ ބަލަހައްޓަވައެވެ. 

ހަނޑަސްބުރިއަކީ ގިފިލީގައި ހާޖަތްކުރުމަށް ކަނޑައަޅައިފައި އޮންނަ ސަރަހައްދެވެ. އެއީ ތާހިރުކަމުގެ ގޮތުން މާ ސައްޙަ ހިސާބެއް ނޫނެވެ. ނަމަވެސް ބައްޕަގެ ބެއްލެވުމުގެ ދަށުން ވަރަށް ސާފުކޮށް އެ ސަރަހައްދު އޮވެއެވެ. އެހެންކަމުން ތަން ބޭނުންކުރުމުގައި ކަންބޮޑުވުމެއް ނޯވެއެވެ. ހިތާމައަކީ މި ޒަމާނަށް ބަލާއިރު އޭރުގެ އެ ވޭންހުރި ނޫނީ ވޭން އުފުލި ޙަޔާތް ނުވިސްނޭ މީހުންނާއި ޒުވާނުން އުޅޭކަމެވެ. 

ދިވެހިންނާއި އެފް އެމް Kurolhi Mazumoonu Fm

ދިވެހިންނާއި އެފް އެމް

އާދަމް ޒާހިރު (ކުރޮޅި) 2015

މިއަދަކީ ރާއްޖޭގެ މީޑިއާ ތަރައްޤީއަށް ހަރުފަތެއްގެ އުސްމިން ލިބުނު އަހަރީ ދުވަހެކެވެ. މިޒަމާނުގެ މަޤުބޫލު މީދިއާ އިންޖީނެއްގެ ފޮނުވުމެއް ފެށުނު ދުވަހެކެވެ. ދިވެހި އެފް އެމްގެ ނަމުގައި ރޭޑިޔޯ ބްރޯޑްކާސްޓިންއެއް ފެށުނުތާ 9 އަހަރު ފުރޭ އަހަރީދުވަހެވެ. މި މުނާސަބަތުގައި ދިފެހި އެފް.އެމްގެ ވެރިންނަށާއި މި މީޑިއާގައި ޚިދުމަތްކުރައްވާ އެންމެހާ ހުނަރުވެރިންނަށާއި އެހުންތެރިންނަށް ތަހުނިޔާ އަރިސްކުރަމެވެ.

މާލޭ ރޭޑިޔޯގެ ނަމުގައި މީލާދީން 1962 ގައި ރޭޑިޔޯ އެއް ފެށި ތަރައްޤީވަމުން އައިސް އޭގެ ދަށުން އުފެދުނު މި، ދިވެހިއެފްއެމް އަކީ ވަރަށް ހަލުވި ކުރިއެރުމެއް ހޯދައިފައިވާ މީޑިއާއެކެވެ. ޒުވާނުންނާއި ޅަފުރާކުދިންނާއި ހަރުންގެ ރުހުމާއި ލޯބި ލިބިފައިވާ މުނާސަބު މީޑިއާއެކެވެ.

ރާއްޖޭގައި ދިވެހި އެފް. އެމް ގެ ނަމުގައި ރަސްމީކޮށް އެފްއެމް ސްޓޭޝަނެއް ހިންގަންފެށީ މީގެ ނުވަ އަހަރުކުރިން 1 އޭޕްރީލް 2006 ގައެވެ. އެ ދުވަހުގެ ހެނދުނ9:00 ގައި އިއްވައިލި މި މީޑިއާގެ ނަން ރާއްޖެ އެފްއެމްގެނަމުން ފެށި ހިނގައިގަތްކަމުގައިވިޔަސް 2012 ވަނަ އަހަރުގެ މެއިމަހުގައި މި ރޭޑިޔޯގެ ނަން "ދިވެހިއެފްއެމް" ގެނަމަށް ބަދަލުކުރެވުނެވެ. އެއީ މި ރޭޑިޔޯގެ ބަލަދުވެރިކަން "މޯލްޑިވްސް ބްރޯޑްކާސްޓިންގ ކޯޕަރޭޝަން ގެ ދަށަށް ބަދަލުވުމާއެކުގައެވެ.

ދިވެހިބަހަކީ ކޮބައިތޯއެވެ؟ Kurolhi Mazumoonu Dhivehi bas

ދިވެހިބަހަކީ ކޮބައިތޯއެވެ؟

އާދަމް ޒާހިރު (ކުރޮޅި) 2015 އޭޕްރީލް

ދިވެހި ބަހަކީ ދިވެހިން ވާހަކަދައްކައި މުޢާމަލާތުގެ އެންމެހާކަމެއްގައި ބޭނުންކުރާ ތިމައުރެންގެ އަމިއްލަ މާދަރީބަހެވެ. ދިވެހި ނަސްލަށް ނިސްބަތްވާ ދިވެހިންގެ އަޑު މަޚުރަޖު އޮވެ މިލްކީ ބާރެއް ލިބިފައިވާ ދިވެހިވަންތަ ދިވެހިބަހެވެ. ދިވެހިދަރިންކުރެ ކާބަފައިވެ ދިޔަ ޢިއްޒަތްތެރިންގެ ފުށުން މިއަދާހަމައަށް ވާރުތަވެ ބާރުވެރިވެފައިވާ ދިވެހިނަމުން ނަންކިއިފައިވި ދިވެހިބަހެވެ. ތާރީޚު ލިޔުންތެރިޔާ ނަސީމާ ވިދާޅުވާގޮތުގައި ދިވެހިން މި ފަސްގަނޑުގައި ދިރިއުޅެން ފެށީއްސުރެ ވާހަކަދެއްކުމުގައި ބޭނުންކުރާ މި ބަހުގެ ޢުމުރުން 2500 އަހަރަށްވުރެ ގިނަވެދާނެއެވެ.

ރާއްޖޭގެ ރައީސުލް ޖުމުހޫރިއްޔާ އަލް މުޙުތަރަމް ޢަބްދުﷲ ޔާމީން ޢަބްދުލްޤައްޔޫމު (2014) ވިދާޅުވާގޮތުގައި މިއީ މުހިންމު ދިވެހި މުދަލެކެވެ. ދިވެހިބަހުގެ ދުވަސް ފާހަގަކުރުމަށް ތަރުޙީބުދެއްވައި ޢާންމުކުރެއްވި ޚިޠާބެއްގައި އެމަނިކުފާނު ލިޔުއްވައިފައިވެއެވެ. "ޝައްކެއްނެތް ގޮތުގައި އަޅުގަނޑުމެންގެ ފަޚުރުވެރި ދިވެހިބަހަކީ ދިވެހި ޤައުމިއްޔަތުގެ އެންމެ މުހިންމު އެއް އަސާސެވެ. އަޅުގަނޑުމެންގެ ތަރައްޤީގެ ހުރިހާ ނާރެހެއްގައި މަސައްކަތް ކުރަނީ ދިވެހިބަހުގެ ވާސިޠާއިންނެވެ. އަޅުގަނޑުމެންގެ ތެރޭގައި ޒަމާނުއްސުރެ މި އޮތް އިސްލާމީ ވަޙުދަތުގެ އެންމެ މުހިންމު ވަސީލަތަކީ ދިވެހިބަހެވެ. ދިވެހިބަހަކީ އިޖުތިމާޢީ ހަމަޖެހުމާއި އިޤްތިޞާދީ ކުރިއެރުން ދިވެހި ޤައުމަށް ގެނެސް ދިނުމުގެ އެންމެ މުހިންމު ބައިވެރިޔާއެވެ.  ދިވެހިބަހަކީ ދިވެހި ޤައުމިއްޔަތުގެ އެއް ޝަރަފެވެ. އެހެންކަމުން، ދިވެހިބަހަށް އިސްކަންދިނުމަކީ ދިވެހިންގެ މައްޗަށް އޮތް އިޖުތިމާޢީ ވާޖިބެއްކަން ކަށަވަރެވެ."

ބައިނަލް އަޤުވާމީ ޞިއްޙަތުގެ ދުވަސް Kurolhi Mazumoonu sihhathu dan'duge saafukan

ދަނޑުން ތައްޓަށް- ސާފު ކާނާ

އާދަމް ޒާހިރު (ކުރޮޅި) 2015 އޭޕްރީލް 6

މިއަދަކީ ބައިނަލްއަޤްވާމީ ސިއްޙަތު ދުވަހެވެ. ދުނިޔޭގެ ފެންވަރުގައި ފާހަގަކުރާ ދުޅަހެޔޮކަމަށް ތާއީދުކޮށް ވާހަކަދައްކައި މުހިންމު ނުކުތާތަކާމެދު މަޝްވާރާކޮށް ޚާއްސަ ކަންކަމާމެދު ފިކުރުކުރުމަށް ވިސްނާން ޚާއްސަކުރެވިފައިވާ ދުވަހެވެ. މި ދުވަސް ފާހަގަކުރެވޭ ހިނދު ރާއްޖޭގެ ސިއްޙީ ޙާލަތު މި ޤައުމުގައި އޮތް ގޮތާމެދު ފިކުރުކޮށްލުމީ ކޮންމެ ދިވެއްސެއްގެ ވިސްނުމެއްކަމުގައި ދެކެމާ ހިނގާށެވެ.

ދުނިޔޭގެ ފެންވަރުގައި މި ދުވަސް ފާހަގަކުރަން ނިންމީ މީލާދީން 1948 ވަނަ އަހަރުއެވެ. މި އަހަރު ވޯލްޑް ހެލްތް އެސެމްބްލީއިން މި ދުވަސް މިނަމުުގައި ފާހަގަކުރަން ނިންމުމާއި ގުޅިގެން ކޮންމެ އަހަރެއްގެ 7 އޭޕްރީލްގައި މިދުވަސް ފާހަގަކުރަނީއެވެ. ރަސްމީގޮތެއްގައި މި ދުވަސް ފާހަގަކުރި ފުރަތަމަ ތާރީޚަކީ 7 އޭޕްރީލް 1950 އެވެ. އެއަށްފަހު ދުނިޔޭގެ އެތައް ޤައުމެއްގައި ފައިދާކުރަނިވިގޮތެއްގައި މި ދުވަސް ފާހަގަކުރާކަމުގައި ރެކޯޑްތަކުން ދައްކައެވެ. އަދި މި ދުވަސް ފާހަގަކުރުމުގައި ސިއްހި އެތައް އެތައް މަޢުލޫމާތެއް އާންމުކުރެވޭކަންވެސް ފާހަގަކުރަމެވެ.