ދިވެހިންނާއި އެފް އެމް Kurolhi Mazumoonu Fm

ދިވެހިންނާއި އެފް އެމް

އާދަމް ޒާހިރު (ކުރޮޅި) 2015

މިއަދަކީ ރާއްޖޭގެ މީޑިއާ ތަރައްޤީއަށް ހަރުފަތެއްގެ އުސްމިން ލިބުނު އަހަރީ ދުވަހެކެވެ. މިޒަމާނުގެ މަޤުބޫލު މީދިއާ އިންޖީނެއްގެ ފޮނުވުމެއް ފެށުނު ދުވަހެކެވެ. ދިވެހި އެފް އެމްގެ ނަމުގައި ރޭޑިޔޯ ބްރޯޑްކާސްޓިންއެއް ފެށުނުތާ 9 އަހަރު ފުރޭ އަހަރީދުވަހެވެ. މި މުނާސަބަތުގައި ދިފެހި އެފް.އެމްގެ ވެރިންނަށާއި މި މީޑިއާގައި ޚިދުމަތްކުރައްވާ އެންމެހާ ހުނަރުވެރިންނަށާއި އެހުންތެރިންނަށް ތަހުނިޔާ އަރިސްކުރަމެވެ.

މާލޭ ރޭޑިޔޯގެ ނަމުގައި މީލާދީން 1962 ގައި ރޭޑިޔޯ އެއް ފެށި ތަރައްޤީވަމުން އައިސް އޭގެ ދަށުން އުފެދުނު މި، ދިވެހިއެފްއެމް އަކީ ވަރަށް ހަލުވި ކުރިއެރުމެއް ހޯދައިފައިވާ މީޑިއާއެކެވެ. ޒުވާނުންނާއި ޅަފުރާކުދިންނާއި ހަރުންގެ ރުހުމާއި ލޯބި ލިބިފައިވާ މުނާސަބު މީޑިއާއެކެވެ.

ރާއްޖޭގައި ދިވެހި އެފް. އެމް ގެ ނަމުގައި ރަސްމީކޮށް އެފްއެމް ސްޓޭޝަނެއް ހިންގަންފެށީ މީގެ ނުވަ އަހަރުކުރިން 1 އޭޕްރީލް 2006 ގައެވެ. އެ ދުވަހުގެ ހެނދުނ9:00 ގައި އިއްވައިލި މި މީޑިއާގެ ނަން ރާއްޖެ އެފްއެމްގެނަމުން ފެށި ހިނގައިގަތްކަމުގައިވިޔަސް 2012 ވަނަ އަހަރުގެ މެއިމަހުގައި މި ރޭޑިޔޯގެ ނަން "ދިވެހިއެފްއެމް" ގެނަމަށް ބަދަލުކުރެވުނެވެ. އެއީ މި ރޭޑިޔޯގެ ބަލަދުވެރިކަން "މޯލްޑިވްސް ބްރޯޑްކާސްޓިންގ ކޯޕަރޭޝަން ގެ ދަށަށް ބަދަލުވުމާއެކުގައެވެ.

އެފް އެމް ބްރޯޑްކާސްޓިންއަކީ ރޭޑިޔޯ މެދުވެރިކޮށް އާންމުންނަށް މަޢުލޫމާތާއި ޚަބަރު ފޯރުކޮށްދިނުމެވެ. މިއީ އަގު ހެޔޮ އަދި، މީޑިއާގެ ލުއި ނިޒާމެކެވެ. މިއީ ދުނިޔޭގެ އެކި ސަރަޙައްދަށް އޭގެ ނިޒާމު ބައިކުރެވިގެން ރޭޑިއޯ ސްޓޭޝަނަކުން އާންމުކުރާ ޚާއްސަ ނިޒާމެކެވެ. މި ޒަމާނަށް މީހުންގެ މަޤުބޫލުކަން ލިބެމުން ތަރައްޤީވަމުން އަންނަ މީޑިއާއެކެވެ. ގިނަ ޤައުމުތަކުގައި މި ބްރޯޑްކާސްޓިން ހިނގައިގަތްފައިވަނީ މުނިފޫހިފިލުވާ އަދި މަޖާކޮށްހަދާ ޒުވާން ޚިޔާލުގެ ފޮނުވުންތަކަށެވެ. ނަމަވެސް މިއަދު މިއީވެސް ޢިލްމީ ކަންކަމަށް ޖާގަ އޮތް ރޭޑިޔޯއެކެވެ.

އެމެރިކާގައި އެފްއެމް ރޭޑިޔޯގެ ޚިދުމަތް ފެށުނުކަމުގައިވަނީ މީލާދީން 1930 ގައެވެ. ނޯތް އެމެރިކާގައި މި މީޑިއާ ޢާންމު ވާންފެށީ 1960ގެވެސް ފަހުންނެވެ. ތާރީޚީ ލިޔުންތަކުން އެނގޭގޮތުގައި، ޗެނެލްތައް ވަކި އިންތިޒާމަކުން ބަހައި އެފްއެމް ބޭންޑުތައް ބައިކުރެވިގެން ދިޔައީ މީލާދީން 1984ގައެވެ.

އެޑްވިން ހާރވާޑް ހާމަކުރާގޮތުގައި އެފް.އެމް.ބޭންޑް ރަސްމީގޮތުން ފެށުނީ 26 ޑިސެމްބަރ 1933 ގައެވެ. ނަމަވެސް ދުނިޔޭގައި ރެކޯޑްކުރެވިފައިވާގޮތުގައި އެފެ.އެމް. ރޭޑިއޯ ޓެލެކާސްޓުކުރުމުގެ ފުރަތަމަ ޙަރަކާތެއް ހިނގައިފައިވަނީ މީލާދީން 1895ގައިކަމަށް ވެއެވެ. އެއީ އިޓާލީގައި ދިރިއުޅުއްވި ގުގްލައިލްމޯ މާރކޯނި ކިޔާމީހަކު ގޮތްބަލަން އީޖާދުކުރި ނިޒާމެއް މެދުވެރިކޮށް ފެށުނު ޙަރަކާތެއްގެތެރެއިންނެވެ. މީލާދީން 1874 ގައި އުފަން ވި މި ޢިލްމުވެރި އިންޖީނޭރު މި އަޖުމަކުރުމާގުޅިގެން ދުނިޔޭގައި އެފް.އެމް. ބްރޯޑްކާސްޓިން ފެށުނީއެވެ. މާރކޯނި، 1937 ގައި ދުނިޔެ ދޫކުރިއިރު މި ޢިލްމު ބަލައިގެން އެތައްބަޔަކު އިތުރަށް މި ހޯދުން ތަރައްޤީކޮށްފައިވެއެވެ.

މާރކޯނީގެ މި އީޖާދު ފައްކާކޮށް ޢިލްމީ ކަންކަމުގައި އަދި ޤައުމީ ކަންކަމުގައި ބޭނުންކުރުން ފެށިފައިވަނީ މީލާދީން 1901 ގައިކަމަށްވެސް ލިޔެވިފައިވެއެވެ.

ކޮންމެއަކަސް މިއަށްފަހު އައި އިތުރު ތަރައްޤީއާއެކު ރަސްމީގޮތެއްގައި ޤަވައިދުތައްހެދި ޓްރާންސްމިޝަންތަކުގެ އިންތައް ހާމަކޮށް ހިންގަންފެށިފައިވަނީ މީލާދީން 1906 ގައި އޮސްޓްރޭލިޔާގައެވެ. ދެން މުޅި ދުނިޔެއަށް މި ނިޒާމު ޢާންމުވެގެން ދިޔައެވެ. މިއަހަރުގެ މި ދުވަސް އައިއިރު މި ރާއްޖޭގައިވެސް އެފް.އެމް.ބްރޯޑްކާސްޓަރުން ގިނަވެ ލިބޭ ތަރުޙީބު ވަނީ އިތުރުވެފައެވެ.

ރާއްޖޭގެ ޤާނޫނީ އިމުގައި ޖާގަ ފުޅާވެ ލިބުނު ކުރިއެރުމުގެ ތެރޭގައި މި ދިވެހިރާއްޖޭގައި ޙަރަކާތްތެރިވާ އެފް.އެމް.ރޭޑިޔޯގެ ނަމުގައި އަށް ޗެނަލެއް ރެޖިސްޓްރީކޮށްފައިވެއެވެ. މިގޮތުން ލިސްޓުކުރެވިފައިވަނީ:

-        ރޭޑިޔޯ2 މާލެ.

-        ރާއްޖެ އެފް.އެމް.

-        އެޗް.އެފް.އެމް މާލެ.

-        ސަން އެފް.އެމް. މާލެ.

-        ދި.އެފް.އެމް މާލެ .

-        ކެޕިޓަލް ރޭޑިޔޯ މާލެ.

-        ރޭޑިޔޯ އެޓޮލް މާލެ

-        ފާރަވޭ އެފް.އެމް. އެވެ.

އެމް.ބީ.ސީގެ ބަލަދުވެރިކަމުގެ ދަށުގައި ހިނގަމުންއަންނަ، މިއަދަށް 9 އަހަރުފުރުނު ދިވެހި އެފް.އެމް 91 މެގަހާޓްސް ނުވަތަ ދިވެހި އެފް އެމް އަކީ މުނިފޫހި ފިލުވުމުގެ ތެރެއިން ޒުވާނުންގެ ހޭލުންތެރިކަން އިތުރުކުރުމުގެ ނިޔަތުގައި އެ އަމާޒަށް ފެށުނު ޚިދުމަތެކެވެ. އަދި ޤައުމީ މި ބޭނުމަށް ތަފާތު މެސެޖްތައް ދިނުމުގެ ގޮތުންނާއި ދިވެހި މުޖްތަމަޢުން މިހާރަކަށް އައިސް ފާހަގަކުރެވޭ ނޭދެވޭ އެކިއެކި މައްސަލަތައް ހައްލުކުރުމަށް ކުރެވޭ މަސައްކަތްތަކުގެ އެއް ހަރަކާތެވެ. ޤައުމީ ޚިދުމަތަށާއި ތަރައްޤީއަށް ދިވެހި ޒުވާނުންގެ މުހިންމުކަމާއި ބޭނުންތެރިކަން އަންގައިދިނުމުގެ ގޮތުން ކުރިއަށްގެންދާ މި ޗެނަލަކީ މިއަދު އެ އަމާޒުގައި އެންމެ ފުންނާބު އުސް އެއް މީޑިއާއެވެ. މިއުޒިކް ޗެނަލްއެއްގެ ގޮތުގައި ފެށުނު، މި ދިވެހި އެފް އެމް މުނިފޫހި ފިލުވުމުގެ އެހީއެއްކަމުގައިވިއެވެ. ނަމަވެސް މާ ގިނަދުވަހެއް ނުވެ އެެހެން ދާއިރާތަކުގެ މުހިންމު މަޢުލޫމާތާއި ރާއްޖެއާއި ރާއްޖޭން ބޭރުގެ އެކި ކަންކަމާއި ގުޅޭ މައުލޫމާތުމި ޗެނަލުން ގެނެސްދޭން ފެށިއެވެ.

ދިވެހި އެފް.އެމް ފެށިގެން އައި ދުވަސްވަރު އަޑުތައް ލިބެމުންދިޔައީ މާލެއާއި މާލެ ކައިރިރަށްތަކަށް އެކަންޏެވެ. ނަމަވެސް ގިނަދުވަސްތަކެއް ނުވެ ދިވެހި އެފް.އެމްގެ ސިގްނަލް ރަސްމީކޮށް އަތޮޅުތަކަށް ދޫކުރަންފެށިއެވެ. މިގޮތުން އެންމެ ފުރަތަމަ ދޫކުރެވިގެންދިޔައީ ހުވަދޫ އަތޮޅަށެވެ. މި އަތޮޅުގެ ދެ ބަޔަށްވެސް މި ޚިދުމަތް ދޭންފެށީ މީލާދީން 2007 ގައެވެ.

މިއަދު މި މީޑިއާއަށް 9 އަހަރުފުރުން ފާހަގަކުރާއިރު ދިވެހި އެފްއެމްގެ  އަޑުވަނީ މުޅި ރާއްޖެއަށް ދޫކޮށްފައެވެ. މިއީ މިފަދަ ޅަ މީޑިއާއަކަށް ވަރަށް ކާމިޔާބު ނަތީޖާއެކެވެ. ހީވާގި މުއައްޒަފުންތަކެއްގެ މިންނެތް މަސައްކަތުން މިފަދަ ޚިދުމަތެއް ލިބިގެންދާކަމީ އެ ޚިދުމަތްތެރިންނަށް މިއަދު ސާބަސް ރައްދުވާކަމެކެވެ.

ﷲގެ ރަޙުމަތްފުޅުން މި ރޭޑިޔޯ ޗެނެލްއަކީ އަބަދަށް ފަހި މީޑިއާއެއްކަމުގައި ލާއްވާނެއެވެ. (ނިމުނީ)