ޅެން ކިޔުމާއި ޢާންމުކޮށް ހުށަހެޅުން Lhen kiyun Hushahelhun

ޅެން ކިޔުމާއި ޢާންމުކޮށް ހުށަހެޅުން

ލިޔުނީ: އާދަމް ޒާހިރު

ޅެން ކިޔުމަކީވެސް ފަންނެކެވެ. ޅެން ކިޔުމުން ހުށަހެޅުމަކީ އަދި ވަކިން ޚާއްސަ ފަންނެކެވެ. ޙަޤީޤަތަށް ވިސްނައިފިނަމަ ޅެން ކިޔުމުގެ ފާޑުވެރިކަމާއި މޮޅުކަން އޮތީ މިތައް ބަޔަށޭ ކިޔައި އަދަދު ނުކުރެވޭނެއެވެ. އެހެނީ ކޮންމެ މީހަކީ ވަކި ބާވަތެކެވެ. ކޮންމެ މުނާސަބަތަކީ ފަންނުވެރިކަމުގެ އާ ބާބެކެވެ. އެހެންކަމުން ޅެންކިޔުމުގެ ފާޑުވެރިކަން އެތައް ބަޔަކަށް ބެހިގެންދެއެވެ.

އެންމެ ޢާންމު ގޮތެއްގައި ޅެން ކިޔައި ހުށަހެޅުން ފާހަގަކުރެވެނީ 3 ފާޑަކަށެވެ. އެއީ ވަޒަނަށް ކިޔުމާއި ނަލައަށް ކިޔުމާއި މާނައަށް ކިޔުމެވެ.  

ވަޒަނަށް ކިޔުން:

މި ބޭނުމަށް ކިޔާނަމަ ބައިތުގެ ކެނޑުންތައް ހުންނާނީ ތާލު ހަމަވާ ހިސާބަށް ވަކިކޮށް އަޑު ހުއްޓައިލައިގެން ކިޔައިފައިއެވެ. މިގޮތަށް ކިޔާއިރު މާނައަށް އިސްކަމެއް ނުދޭނެއެވެ. އެހެނީ ކިޔުމުގައި މިފަހަރު މި ބަލަނީ ވަޒަން ވަކިވުމުގައި އެއް ތާލެއް ހުރިހުރުމުގެ ފަންނަށެވެ. މިސާލަކަށް؛-

     "ކޮންފަދަ ނަސީ/ ބެއްތޯއެ މީ/ ދޮންވެލި ބިމެއް/ ގައިލެއްވުމީ

     ހަންހާރަވެތި/ ދިވެހިންގެ މީ/ ގިންތީތެރޭ/ ހިމެނުއްވުމީ"

މި ބައިތުގައި ކަތިރޮނގުން ވަކިކޮށްފައި އެެ ވާ އަޑުތަކަށް ހުއްޓަމުން އަޑުގެ ބާރު އާ ފެށުމަކަށް ލަމުން ކިޔުމުން ކިޔޭނީ ވަޒަނަށެވެ. އަދި އޮންނާނީ ޅެމުގެ ތާލު ހުރި ގޮތް ވަކިވެ ސާފުވެފައެވެ. މިއީ ވަޒަނަށް ކިޔުމެވެ.

ނަލައަށްކިޔުން:

މި މާނައިގައި ކިޔާނަމަ ބަލާނީ އަޑުއަހާ މީހުންގެ ޝައުޤު ހޯދޭނޭ ގޮތަކަށެވެ. ފަހަރެއްގައި ވަޒަނަށް ނޫން ތަންތަނަށްވެސް ހުއްޓައިފާނެއެވެ. ލަފުޒުގެ ފެށުން ދަމަދަމައި ހުރެވެސްދާނެއެވެ. އަދި އަޑު ތަކުރާރުކުރުމާއި ވިންދާ ކުޅެލާފަދަ އެެތައް ކަމެއް ކޮށްފާނެއެފވެ. ބަލާނީ ޅެމުގައި ބުނާއެެއްޗެއް ދޭހަކޮށްދިނުމާއެކު އެހުންތެރިންގެ ސަމާލުކަން ހޯދުމަށެވެ. އަދި ޅެމުން އަދަބީ އުޖާލާކަމެއް ގެނައުމަށެވެ. https://www.youtube.com/watch?v=ZxqIVVpiCGw  މިއީ އެއް މިސާލެވެ. https://www.youtube.com/watch?v=KP8pvH-ky3E މިއީ އަނެއް މިސާލެވެ. ހުށަހެޅުމުގައި މުޅިން ތަފާތު ދެ ބާވަތެއްގެ އަދަބެކެވެ. މި ގޮތްގޮތަށް ކިޔޭނީ ނަލަކޮށް ކިޔުންކަމުގައެވެ.

މާނައަށް ކިޔުން:

އިސްވެދިނަ ނަލަކިޔުމުގެ މިސާލުގެތެރޭގައި މާނައަށް ކިޔުމުގެ މިސާލުވެސް އެބަ ފެނެއެވެ. އިތުރަށް ބުނެދޭނަމަ ފާހަގަކޮށްލެވޭ ކަންކަމަކީ، މާނައަށް ކިޔާއިރު މާނައަށް އިސްކަން ދޭން މުހިންމުކަމުގެ ވާހަކައެވެ. ޙަޤީޤަތުގައި މާނައަށް ކިޔުމަކީ މާނަ އިސްކޮށްގެން އެ މާނަ، އެހުންތެރިންނަށް ވިސްނައިދިނުމަށް ކިޔުމެވެ. މި ކިޔުމުގައި ތަކުރާރުކުރުމާއި ރާގު ބަދަލުކުރުމާއި ހުއްޓުންތަކުގައި އިތުރު ގޮތްގޮތް ހިމެނުން ވެއެވެ.

ޅެން ހުށަހެޅުން

ޅެން ހުށަހެޅުމަކީ ކިޔުމުގެ ހުނަރުގެ ތެރެއިން ހިމެނޭ ކަމެކެވެ. އެހެންކަމުން ޅެން ހުށަހެޅުމުގައި އިހަށް ދިޔަ ގޮތްތަކުގެ ތެރެއިން ކޮންމެ ގޮތެއްގައި ކީކަމުގައިވިޔަސް އަޑާއި ރާގަށް ބަދަލު ގެނައުމާއި ޙަރަކާތް ބޭނުންކުރުމާއި، ބައެއް ފަހަރު، މުނާސަބުގޮތްގޮތަށް އެެއްޗެއްސާއި މީހުން ބޭނުންކުރުން ހިމެނެއެވެ. އަދި ރާގު ރާގަށް ކިޔުމުގެ ތެރެއިން ސަމާލުކަން ހޯދުންވެސް ހިމެނެއެވެ. ނުވިތާކަށް އެ ޅެމަކާ ގުޅޭގޮތުން ހުށަހަޅާނޭ ޒަމާނީ ވަސީލަތްވެސް ބޭނުންކުރެވިދާނެއެވެ.

ޅެން ހުށަހެޅުމުގައި މުނާސަބަތާ ގުޅޭނަމަ ޅެން މާނަކުރުމާއި ޅެމަށާއި ޝާޢިރަށް ތަޢުރީފުކުރުން ހިމެނިދާނެއެވެ. އަދި ބާޒީކުރުމުގެގޮތުން ގަދަ ބާރުލުމާއި ވާދަވެރި ޙަރަކާތްތައް ގެނައުން ހިމެނިދާނެއެވެ. އަދި މިޔުޒިކް ނުވަތަ ދުންމާރީގެ ބާވަތްތައް ބޭނުންކުރެވިދާނެއެވެ.

ދިވެހި ޅެމުގެތެރޭގައި ފަރިއްސަކީ ވާހަކައިން އުފެދި އިތުރުވި ބާވަތެކެވެ. މި ބަވަތަކީ ހުށަހެޅުމުގައި އެންމެ ފަންނުވެރި އެެއް ބަވަތްކަމުގައި ޤަބޫލުކުރެވެއެވެ. ފަރިހި ކިޔާއިރު ފަތިގަނޑުޖެހުމާއި ޑަބިޔާ ޖެހުމާއި ވާދަ ކިޔުން ހިމެނެއެވެ. މިއީ މުނާސަބާ ކިޔުމެކެވެ. މި ޒަމާނުގައި ޅެން ކިޔައި ހުށަހެޅުމަށް ޒަމާނާ ގުޅޭ ބަދަލު ގެނެސް ކަމުގެ ފޯރި ޖެއްސިދާނެއެވެ. މިއީ އަސަރުގަދަ ކަމެކެވެ.

ފުރިހަމަ ހުށަހެޅުމެއްގައި ޅެން ކިޔައިގެން، ހުށަހަޅައިދީގެން އެހުންތެރިން ރޮއްވައިލެވިދާނެއެވެ. ހެއްވައި މަޖާކޮށްލެވޭނެއެވެ. އަދި ރުޅިއަރައިދާނޭ ގޮތްވެސް ހެދޭނެއެވެ. އެހެންކަމުން ޅެން ހުށަހެޅުމަކީ އަދަބުންކުރެވޭ ސަމާސާއެެއްކަމުގައި ނޫނީ ނުވެއެވެ. އަދަބުން އިންސާނާއާ ކުޅުންކަމުގައި ނޫނީ ނުވެއެވެ. އަދަބީ ނުފޫޒުން ބަޔަކުގެ ހިތްތައް މަތަކުރުންކަމުގައި ނޫނި ނުވެއެވެ. މިއީ ބާރުހުރި އަދަބީ ފަންވަރެކެވެ.